दारिद्र्य दहन शिवस्तोत्रम्

दारिद्र्य दहन शिवस्तोत्रम्

विश्वेश्वराय नरकार्णव तारणाय कर्णामृताय शशिशेखरधारणाय ।

कर्पूरकान्तिधवलाय जटाधराय दारिद्र्य दुःखदहनाय नमः शिवाय ॥ १॥

गौरीप्रियाय रजनीशकलाधराय कालान्तकाय भुजगाधिपकङ्कणाय ।

गङ्गाधराय गजराजविमर्दनाय दारिद्र्य दुःखदहनाय नमः शिवाय ॥ २॥

भक्‍तिप्रियाय भवरोगभयापहाय उग्राय दुर्गभवसागरतारणाय ।

ज्योतिर्मयाय गुणनामसुनृत्यकाय दारिद्र्य दुःखदहनाय नमः शिवाय ॥ ३॥

चर्मम्बराय शवभस्मविलेपनाय भालेक्षणाय मणिकुण्डलमण्डिताय ।

मञ्झीरपादयुगलाय जटाधराय दारिद्र्य दुःखदहनाय नमः शिवाय ॥ ४॥

पञ्चाननाय फणिराजविभूषणाय हेमांशुकाय भुवनत्रयमण्डिताय ।

आनन्दभूमिवरदाय तमोमयाय दारिद्र्य दुःखदहनाय नमः शिवाय ॥ ५॥

भानुप्रियाय भवसागरतारणाय कालान्तकाय कमलासनपूजिताय ।

नेत्रत्रयाय शुभलक्षण लक्षिताय दारिद्र्य दुःखदहनाय नमः शिवाय ॥ ६॥

रामप्रियाय रघुनाथवरप्रदाय नागप्रियाय नरकार्णवतारणाय ।

पुण्येषु पुण्यभरिताय सुरार्चिताय दारिद्र्य दुःखदहनाय नमः शिवाय ॥ ७॥

मुक्‍तेश्वराय फलदाय गणेश्वराय गीतप्रियाय वृषभेश्वरवाहनाय ।

मातङ्गचर्मवसनाय महेश्वराय दारिद्र्य दुःखदहनाय नमः शिवाय ॥ ८॥

वसिष्ठेन कृतं स्तोत्रं सर्वरोगनिवारणं ।

सर्वसम्पत्करं शीघ्रं पुत्रपौत्रादिवर्धनम् ।

त्रिसन्ध्यं यः पठेन्नित्यं स हि स्वर्गमवाप्नुयात् ॥ ९॥

॥ इति श्रीवसिष्ठविरचितं दारिद्र्यदहनशिवस्तोत्रं सम्पूर्णम् ॥

ब्रह्माकृत शिव स्तोत्रम् [ हिंदी अर्थ सहित ]

ब्रह्माकृत शिव स्तोत्रम्

परमपिता ब्रह्मा ने पर्मात्मा एवं परंब्रह्म शिव की उपासना की थी। इस स्तोत्र को ब्रह्मा कृत माना जाता है।

नमस्ते भगवान रुद्र भास्करामित तेजसे !

नमो भवाय देवाय रसायाम्बुमयात्मने !!

ब्रह्माजी बोले कि हे भगवान! हे रुद्र! आपका तेज अनगिनत सूर्यों के तेज सा है| रसरूप, जलमय विग्रहवाले हे भवदेव! आपको नमस्कार है|

शर्वाय क्षितिरूपाय नंदीसुरभये नमः !

ईशाय वसवे सुभ्यं नमः स्पर्शमयात्मने !!

नंदी और सुरभि कामधेनु भी आपके ही प्रतिरूप हैं| पृथ्वी को धारण करनेवाले हे शर्वदेव! आपको नमस्कार है| हे वायुरुपधारी, वसुरुपधारी आपको नमस्कार है|

पशूनां पतये चैव पावकायातितेजसे !

भीमाय व्योम रूपाय शब्द मात्राय ते नमः !!

अग्निरुप तेज व पशुपति रूपवाले हे देव! आपको नमस्कार है| शब्द तन्मात्रा से युक्त आकाश रूपवाले हे भीमदेव! आपको नमस्कार है|

उग्रायोग्रास्वरूपाय यजमानात्मने नमः!

महाशिवाय सोमाय नमस्त्वमृत मूर्तये !!

हे उग्ररूपधारी यजमान सदृश आपको नमस्कार है| सोमरूप अमृतमूर्ति हे महादेव! आपको नमस्कार है|

बाणलिङ्गकवचम्

बाणलिङ्गकवचम्

अस्य बाणलिङ्ग कवचस्य संहारभैरवऋषिर्गायत्रीच्छन्दः,

हौं बीजं, हूं शक्तिः, नमः कीलकं, श्रीबाणलिङ्ग सदाशिवो देवता,

ममाभीष्ट सिद्ध्यर्थं जपे विनियोगः ॥ 

ॐ कारो मे शिरः पातु नमः पातु ललाटकम् ।

शिवस्य कण्ठदेशं मे वक्षोदेशं षडक्षरम् ॥ १॥ 

बाणेश्वरः कटीं पातु द्वावूरू चन्द्रशेखरः ।

पादौ विश्वेश्वरः साक्षात् सर्व्वाङ्गं लिङ्गरूपधृक् ॥ २॥ 

इतिदं कवचं पूर्व्वं बाणलिङ्गस्य कान्ते

पठति यदि मनुष्यः प्राञ्जलिः शुद्धचित्तः ।

व्रजति शिवसमीपं रोगोशोकप्रमुक्तो

बहुधनसुखभोगी बाणलिङ्ग प्रसादतः ॥ ३॥

इति बाणलिङ्ग कवचं समाप्तम् ॥

वैद्यनाथाष्टकम्

वैद्यनाथाष्टकम्

श्रीरामसौमित्रिजटायुवेद षडाननादित्य कुजार्चिताय ।

श्रीनीलकण्ठाय दयामयाय श्रीवैद्यनाथाय नमःशिवाय ॥ १॥

शम्भो महादेव शम्भो महादेव शम्भो महादेव शम्भो महादेव ।

शम्भो महादेव शम्भो महादेव शम्भो महादेव शम्भो महादेव ॥

गङ्गाप्रवाहेन्दु जटाधराय त्रिलोचनाय स्मर कालहन्त्रे ।

समस्त देवैरभिपूजिताय श्रीवैद्यनाथाय  नमः शिवाय ॥ २॥

शम्भो महादेव ....

भक्तःप्रियाय त्रिपुरान्तकाय पिनाकिने दुष्टहराय नित्यम् ।

प्रत्यक्षलीलाय मनुष्यलोके श्रीवैद्यनाथाय नमः शिवाय ॥ ३॥

शम्भो महादेव ....

प्रभूतवातादि समस्तरोग प्रनाशकर्त्रे मुनिवन्दिताय ।

प्रभाकरेन्द्वग्नि विलोचनाय श्रीवैद्यनाथाय नमः शिवाय ॥ ४॥

शम्भो महादेव ....

वाक् श्रोत्र नेत्राङ्घ्रि विहीनजन्तोः वाक्‍श्रोत्रनेत्राङ्घ्रिसुखप्रदाय ।

कुष्ठादिसर्वोन्नतरोगहन्त्रे श्रीवैद्यनाथाय नमः शिवाय ॥ ५॥

शम्भो महादेव ....

वेदान्तवेद्याय जगन्मयाय योगीश्वरद्येय पदाम्बुजाय ।

त्रिमूर्तिरूपाय सहस्रनाम्ने श्रीवैद्यनाथाय नमः शिवाय ॥ ६॥

शम्भो महादेव ....

स्वतीर्थमृद्भस्मभृताङ्गभाजां पिशाचदुःखार्तिभयापहाय ।

आत्मस्वरूपाय शरीरभाजां श्रीवैद्यनाथाय नमः शिवाय ॥ ७॥

शम्भो महादेव ....

श्रीनीलकण्ठाय वृषध्वजाय स्रक्गन्ध भस्माद्यभिशोभिताय ।

सुपुत्रदारादि सुभाग्यदाय श्रीवैद्यनाथाय नमः शिवाय ॥ ८॥

शम्भो महादेव ....

वालाम्बिकेश वैद्येश भवरोगहरेति च ।

जपेन्नामत्रयं नित्यं महारोगनिवारणम् ॥ ९॥

शम्भो महादेव ....

॥ इति श्री वैद्यनाथाष्टकम् ॥

अट्टालसुन्दराष्टकम्

अट्टालसुन्दराष्टकम्

विक्रमपाण्ड्य उवाच-

कल्याणाचलकोदण्डकान्तदोर्दण्डमण्डितम् ।

कबलीकृतसंसारं कलयेऽट्टालसुन्दरम् ॥ १॥

कालकूटप्रभाजालकळङ्कीकृतकन्धरम् ।

कलाधरं कलामौळिं कलयेऽट्टालसुन्दरम् ॥ २॥

कालकालं कलातीतं कलावन्तं च निष्कळम् ।

कमलापतिसंस्तुत्यं कलयेऽट्टालसुन्दरम् ॥ ३॥

कान्तार्धं कमनीयाङ्गं करुणामृतसागरम् ।

कलिकल्मषदोषघ्नं कलयेऽट्टालसुन्दरम् ॥ ४॥

कदम्बकाननाधीशं कांक्षितार्थसुरद्रुमम् ।

कामशासनमीशानं कलयेऽट्टालसुन्दरम् ॥ ५॥

सृष्टानि मायया येन ब्रह्माण्डानि बहूनि च ।

रक्षितानि हतान्यन्ते कलयेऽट्टालसुन्दरम् ॥ ६॥

स्वभक्तजनसन्ताप पापापद्मङ्गतत्परम् ।

कारणं सर्वजगतां कलयेऽट्टालसुन्दरम् ॥ ७॥

कुलशेखरवंशोत्थभूपानां कुलदैवतम् ।

परिपूर्णं चिदानन्दं कलयेऽट्टालसुन्दरम् ॥ ८॥

अट्टालवीरश्रीशम्भोरष्टकं वरमिष्टदम् ।

पठतां शृण्वतां सद्यस्तनोतु परमां श्रियम् ॥ ९॥

॥ इति श्रीहालास्यमाहात्म्ये विक्रमपाण्ड्यकृतं अट्टालसुन्दराष्टकम् ॥

अगस्त्याष्टकम्

अगस्त्याष्टकम्

अद्य मे सफलं जन्म चाद्य मे सफलं तपः ।

अद्य मे सफलं ज्ञानं शम्भो त्वत्पाददर्शनात् ॥ १॥

कृतार्थोऽहं कृतार्थोऽहं कृतार्थोऽहं महेश्वर ।

अद्य ते पादपद्मस्य दर्शनात्भक्तवत्सल ॥ २॥

शिवश्शम्भुः शिवश्शम्भुः शिवश्शम्भुः शिवश्शिवः ।

इति व्याहरतो नित्यं दिनान्यायान्तु यान्तु मे ॥ ३॥

शिवे भक्तिश्शिवे भक्तिश्शिवे भक्तिर्भवेभवे ।

सदा भूयात् सदा भूयात्सदा  भूयात्सुनिश्चला ॥ ४॥

आजन्म मरणं यस्य महादेवान्यदैवतम् ।

माजनिष्यत मद्वंशे जातो वा द्राग्विपद्यताम् ॥ ५॥

जातस्य जायमानस्य गर्भस्थस्याऽपि देहिनः ।

माभून्मम कुले जन्म यस्य शम्भुर्न-दैवतम् ॥ ६॥

वयं धन्या वयं धन्या वयं धन्या जगत्त्रये ।

आदिदेवो महादेवो यदस्मत्कुलदैवतम् ॥ ७॥

हर शम्भो महादेव विश्वेशामरवल्लभ ।

शिवशङ्कर सर्वात्मन्नीलकण्ठ नमोऽस्तु ते ॥ ८॥

अगस्त्याष्टकमेतत्तु यः पठेच्छिवसन्निधौ ।

शिवलोकमवाप्नोति शिवेन सह मोदते ॥ ९॥

॥ इत्यगस्त्याष्टकम् ॥